Kanuni zetu za faragha na usalama.

Tunaamini kuwa dhana hizi haziwezi kutenganishwa. Kwa pamoja, zinawakilisha imani muhimu, ambayo imeathiri kila kitu tulichofanya tangu tulipoanza na kila kitu tutakachofanya baadaye. Watu wanapotumia bidhaa zetu, wanaamini kuwa tutalinda taarifa zao na ni jukumu letu kutimiza matarajio yao. Hii inamaanisha kuwa makini kila wakati kuhusu data tunayotumia, jinsi tunavyoitumia na jinsi tunavyoilinda.

Ili kusaidia watu wafanye maamuzi bora kuhusu jinsi wanavyotumia bidhaa za Google, tunajitahidi kuwafanya waelewe kwa urahisi kuhusu aina ya data tunayokusanya, jinsi tunavyoitumia na sababu za kuikusanya. Kuwa na uwazi kunamaanisha kufanya maelezo haya yapatikane, yaeleweke na yatekelezwe kwa urahisi.

Tunatumia data kufanya bidhaa za Google kama vile Ramani na Tafuta, ziwafae watumiaji kadri iwezekanavyo. Pia tunatumia data kutoa matangazo yanayofaa zaidi. Ingawa matangazo haya yanatusaidia kufadhili huduma zetu na kufanya kila mtu azipate bila malipo, ni muhimu kusisitiza kuwa hatuuzi taarifa binafsi za wanaotumia huduma zetu.

Tunajua kuwa suala la faragha halishughulikiwi kwa njia moja pekee. Kila Akaunti ya Google imeundwa kwa kutumia vidhibiti vya data vinavyoweza kuwashwa au kuzimwa. Hii inamaanisha kuwa watumiaji wetu wanaweze kuchagua mipangilio ya faragha inayowafaa. Kadri teknolojia inavyoendelea kubadilika, ndivyo vidhibiti vyetu vya faragha vinavyobadilika pia, hali inayohakikisha kuwa faragha ni chaguo la binafsi la mtumiaji kila wakati.

Tunaamini kuwa kila mtumiaji anapaswa kuwa na uwezo wa kufikia taarifa binafsi ambazo ameshiriki nasi – wakati wowote na kwa sababu yoyote. Hii ndiyo sababu tunaendelea kufanya iwe rahisi kwa watu kufikia na kukagua data yao, kuipakua na kuihamishia kwenye huduma nyingine iwapo wanataka au kuifuta kabisa.

Kuheshimu faragha ya watumiaji wetu kunahitaji kulinda data wanayotupatia. Ili kudumisha usalama wa kila huduma na bidhaa za Google kwa ajili ya watumiaji wetu, tunabuni na kutumia mojawapo ya mifumo ya usalama ambayo ni thabiti zaidi duniani. Hii inahitaji kuendeleza na kuimarisha teknolojia zetu za ulinzi zilizojumuishwa kwenye mifumo kila wakati ili kutambua na kuzuia vitisho vya mtandaoni vinavyobadilika, kabla havijawafikia watumiaji wetu.

Google inalinda usalama wa wanaotumia bidhaa zake na pia kuchangia usalama wa watumiaji wote kwenye intaneti. Google ndiyo ilikuwa kampuni ya kwanza kubuni viwango vingi vya usalama tunavyotumia sote leo, na tunaendelea kubuni teknolojia mpya za usalama ambazo zinaweza kutumiwa na kila mtu. Tunashiriki ujuzi, maarifa na zana za usalama na washirika, mashirika na washindani wetu duniani kote, kwa sababu usalama wa intaneti unahitaji ushirikiano wa sekta nzima.