ನಮ್ಮ ಗೌಪ್ಯತೆ ಮತ್ತು ಸುರಕ್ಷತೆಯ
ಮೂಲತತ್ವಗಳು.

ಇವೆರಡೂ ವಿಚಾರಗಳನ್ನು ಬೇರ್ಪಡಿಸಲು ಸಾಧ್ಯವಿಲ್ಲ ಎಂಬುದು ನಮ್ಮ ನಂಬಿಕೆ. ಅವೆರಡೂ, ನಾವು ಮೊಟ್ಟ ಮೊದಲ ದಿನದಿಂದ ಈ ಕ್ಷಣದವರೆಗೆ ಮಾಡಿದ ಪ್ರತಿಯೊಂದರ ಮೇಲೂ, ಹಾಗೆಯೇ ನಾವು ಮುಂದೆ ಮಾಡಬಹುದಾದ ಎಲ್ಲಾ ಸಂಗತಿಗಳ ಮೇಲೂ ಅಗಾಧ ಪ್ರಭಾವ ಬೀರುವ ಏಕೈಕ, ಅಂತರ್ಗತ ನಂಬಿಕೆಯನ್ನು ಅವು ಪ್ರತಿನಿಧಿಸುತ್ತವೆ. ಜನರು ನಮ್ಮ ಪ್ರಾಡಕ್ಟ್‌ಗಳನ್ನು ಬಳಸುವಾಗ, ಅವರ ಮಾಹಿತಿಯನ್ನು ನಮಗೆ ನೀಡುವ ಮೂಲಕ ನಮ್ಮ ಮೇಲಿಟ್ಟಿರುವ ತಮ್ಮ ನಂಬಿಕೆಯನ್ನು ವ್ಯಕ್ತಪಡಿಸುತ್ತಾರೆ. ಅವರೊಂದಿಗೆ ಸೂಕ್ತ ರೀತಿಯಲ್ಲಿ ನಡೆದುಕೊಳ್ಳುವುದು ನಮ್ಮ ಕರ್ತವ್ಯವಾಗಿದೆ. ಅಂದರೆ, ನಾವು ಯಾವ ಡೇಟಾವನ್ನು ಬಳಸುತ್ತೇವೆ, ಅದನ್ನು ಹೇಗೆ ಬಳಸುತ್ತೇವೆ, ಮತ್ತು ಹೇಗೆ ರಕ್ಷಿಸುತ್ತೇವೆ ಎಂಬುದರ ಕುರಿತು ಜಾಗರೂಕರಾಗಿರುವುದು ಎಂದರ್ಥ.

ಜನರು Google ಪ್ರೊಡಕ್ಟ್‌ಗಳನ್ನು ಹೇಗೆ ಬಳಸಬಹುದು ಎನ್ನುವುದರ ಕುರಿತು ಅವರು ತಿಳುವಳಿಕೆಯ ನಿರ್ಧಾರಗಳನ್ನು ತೆಗೆದುಕೊಳ್ಳುವಂತೆ ಸಹಾಯ ಮಾಡಲು, ನಾವು ಯಾವ ಡೇಟಾವನ್ನು ಸಂಗ್ರಹಿಸುತ್ತೇವೆ, ಅದನ್ನು ಹೇಗೆ ಮತ್ತು ಏಕೆ ಬಳಸಲಾಗುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ನಾವು ಸುಲಭಗೊಳಿಸಿದ್ದೇವೆ. ಪಾರದರ್ಶಕವಾಗಿರುವುದು ಅಂದರೆ ಈ ಮಾಹಿತಿಯನ್ನು ಸುಲಭವಾಗಿ ಲಭ್ಯವಾಗುವಂತೆ, ಅರ್ಥವಾಗುವಂತೆ ಮತ್ತು ಕಾರ್ಯಗತಗೊಳಿಸುವಂತೆ ಮಾಡುವುದು ಎಂದರ್ಥ.

Search ಮತ್ತು Maps ನಂತಹ Google ಪ್ರಾಡಕ್ಟ್‌ಗಳನ್ನು ಸಾಧ್ಯವಾದಷ್ಟು ಉಪಯುಕ್ತವಾಗುವಂತೆ ಮಾಡಲು, ನಾವು ಡೇಟಾವನ್ನು ಬಳಸುತ್ತೇವೆ. ಹೆಚ್ಚು ಸೂಕ್ತವಾದ ಜಾಹೀರಾತುಗಳನ್ನು ಒದಗಿಸಲು ಸಹ ನಾವು ಡೇಟಾವನ್ನು ಬಳಸುತ್ತೇವೆ. ಈ ಜಾಹೀರಾತುಗಳು ನಮ್ಮ ಸೇವೆಗಳಿಗೆ ಧನ ಸಹಾಯ ಮಾಡುವ ಮೂಲಕ, ಸೇವೆಗಳನ್ನು ಎಲ್ಲರಿಗೂ ಉಚಿತವಾಗಿ ಒದಗಿಸುತ್ತವೆಯಾದರೂ, ನಮ್ಮ ಬಳಕೆದಾರರ ವೈಯಕ್ತಿಕ ಮಾಹಿತಿಯು ಮಾತ್ರ ಮಾರಾಟಕ್ಕಾಗಿ ಅಲ್ಲ ಎಂದು ಸ್ಪಷ್ಟಪಡಿಸುವುದು ಮುಖ್ಯವಾಗಿದೆ.

ಗೌಪ್ಯತೆಯ ವಿಷಯ ಬಂದಾಗ, ಒಂದೇ ಗಾತ್ರವು ಎಲ್ಲರಿಗೂ ಸರಿಹೊಂದುವುದಿಲ್ಲ ಎಂದು ನಮಗೆ ತಿಳಿದಿದೆ. ಪ್ರತಿಯೊಂದು Google ಖಾತೆಯನ್ನು ಆನ್/ಆಫ್ ಡೇಟಾ ನಿಯಂತ್ರಣಗಳ ಮೂಲಕ ರಚಿಸಲಾಗಿರುತ್ತದೆ, ಹೀಗಾಗಿ ನಮ್ಮ ಬಳಕೆದಾರರು ಅವರಿಗೆ ಸೂಕ್ತವಾದ ಗೌಪ್ಯತೆ ಸೆಟ್ಟಿಂಗ್‌ಗಳನ್ನು ಆರಿಸಿಕೊಳ್ಳಬಹುದು. ಮತ್ತು ತಂತ್ರಜ್ಞಾನವು ವಿಕಸನಗೊಂಡಂತೆಲ್ಲಾ ನಮ್ಮ ಗೌಪ್ಯತೆ ನಿಯಂತ್ರಣಗಳನ್ನು ಕೂಡ ಸುಧಾರಿಸಲಾಗುತ್ತದೆ, ಈ ಮೂಲಕ ಗೌಪ್ಯತೆಯು ಯಾವಾಗಲೂ ಬಳಕೆದಾರರಿಗೆ ಸಂಬಂಧಿಸಿದ ವೈಯಕ್ತಿಕ ಆಯ್ಕೆಯಾಗಿದೆ ಎಂದು ಖಚಿತಪಡಿಸುತ್ತದೆ.

ಯಾವುದೇ ಸಮಯವಾಗಿರಲಿ ಮತ್ತು ಏನೇ ಕಾರಣವಿರಲಿ - ಪ್ರತಿಯೊಬ್ಬ ಬಳಕೆದಾರರು ನಮ್ಮೊಂದಿಗೆ ಹಂಚಿಕೊಳ್ಳುವ ಅವರ ವೈಯಕ್ತಿಕ ಮಾಹಿತಿಗೆ ಪ್ರವೇಶವನ್ನು ಹೊಂದಿರಬೇಕು ಎಂದು ನಾವು ನಂಬುತ್ತೇವೆ. ಅದಕ್ಕಾಗಿಯೇ, ಜನರು ತಮ್ಮ ಡೇಟಾವನ್ನು ಪ್ರವೇಶಿಸುವ ಮತ್ತು ಪರಿಶೀಲಿಸುವ, ಡೌನ್‌ಲೋಡ್ ಮಾಡಿಕೊಳ್ಳುವ ಮತ್ತು ತಮಗೆ ಬೇಕೆಂದರೆ, ಅದನ್ನು ಮತ್ತೊಂದು ಸೇವೆಗೆ ವರ್ಗಾಯಿಸುವ ಇಲ್ಲವೇ ಸಂಪೂರ್ಣವಾಗಿ ಅಳಿಸಿಹಾಕುವ ಕಾರ್ಯಗಳನ್ನು ಸುಲಭಗೊಳಿಸುವಲ್ಲಿ ಕಾರ್ಯಮಗ್ನರಾಗಿದ್ದೇವೆ.

ನಮ್ಮ ಬಳಕೆದಾರರ ಗೌಪ್ಯತೆಯನ್ನು ಗೌರವಿಸುವುದು ಎಂದರೆ ಅವರು ನಮ್ಮ ಮೇಲೆ ವಿಶ್ವಾಸವಿಟ್ಟು ಸಲ್ಲಿಸಿದ ಡೇಟಾವನ್ನು ರಕ್ಷಿಸುವುದು ಎಂದರ್ಥ. ನಮ್ಮ ಬಳಕೆದಾರರಿಗೆ Google ನ ಪ್ರತಿಯೊಂದು ಪ್ರಾಡಕ್ಟ್‌ ಮತ್ತು ಸೇವೆಯನ್ನು ಸುರಕ್ಷಿತವಾಗಿರಿಸಲು, ಜಗತ್ತಿನಲ್ಲಿಯೇ ಅತ್ಯಾಧುನಿಕ ಭದ್ರತಾ ಮೂಲಸೌಕರ್ಯಗಳಲ್ಲಿ ಒಂದನ್ನು ನಾವು ರಚಿಸುತ್ತೇವೆ ಮತ್ತು ಬಳಸುತ್ತೇವೆ. ಇದರರ್ಥ, ಹೆಚ್ಚುತ್ತಿರುವ ಆನ್‌ಲೈನ್ ಬೆದರಿಕೆಗಳು ನಮ್ಮ ಬಳಕೆದಾರರ ಮನೆಯ ಹೊಸ್ತಿಲು ಮುಟ್ಟುವ ಮೊದಲೇ ಅವುಗಳನ್ನು ಪತ್ತೆಹಚ್ಚಿ, ಅವುಗಳ ವಿರುದ್ಧ ಹೋರಾಡಲು ನಮ್ಮ ಅಂತರ್ನಿರ್ಮಿತ ಭದ್ರತಾ ತಂತ್ರಜ್ಞಾನಗಳನ್ನು ನಿರಂತರವಾಗಿ ಬಲಪಡಿಸುವುದು ಎಂದಾಗಿದೆ.

ಆನ್‌ಲೈನ್‌ನಲ್ಲಿ ಬಳಕೆದಾರರನ್ನು ಸುರಕ್ಷಿತವಾಗಿರಿಸಿಕೊಳ್ಳುವುದು Google ಮಾತ್ರಕ್ಕೆ ಸೀಮಿತವಾಗಿಲ್ಲ – ಅದು ಸಂಪೂರ್ಣ ಇಂಟರ್ನೆಟ್‌ಗೂ ಅನ್ವಯಿಸುತ್ತದೆ. ನಾವೆಲ್ಲರೂ ಇಂದು ಬಳಸುತ್ತಿರುವ ಬಹುತೇಕ ಸುರಕ್ಷತಾ ಮಾನದಂಡಗಳನ್ನು ರಚಿಸಿದ ಮೊಟ್ಟ ಮೊದಲ ಕಂಪನಿ Google ಆಗಿದೆ, ಮತ್ತು ಪ್ರತಿಯೊಬ್ಬರೂ ಬಳಸಬಹುದಾದ ಹೊಸ ಸುರಕ್ಷತಾ ತಂತ್ರಜ್ಞಾನಗಳ ಆವಿಷ್ಕಾರವನ್ನು ನಾವು ಮುಂದುವರೆಸುತ್ತೇವೆ. ಜಗತ್ತಿನಾದ್ಯಂತ ಪಾಲುದಾರರು, ಸಂಸ್ಥೆಗಳು, ಮತ್ತು ಸ್ಪರ್ಧಿಗಳೊಂದಿಗೆ ನಾವು ನಮ್ಮ ಸುರಕ್ಷತಾ ಕಲಿಕೆಗಳು, ಅನುಭವಗಳು ಮತ್ತು ಪರಿಕರಗಳನ್ನು ಹಂಚಿಕೊಳ್ಳುತ್ತೇವೆ, ಏಕೆಂದರೆ, ಇಂಟರ್ನೆಟ್-ವ್ಯಾಪಕ ಸುರಕ್ಷತೆಗೆ ಉದ್ಯಮ-ವ್ಯಾಪಕ ಸಹಭಾಗಿತ್ವದ ಬೇಡಿಕೆಯಿದೆ.