Jy is in beheer

Jy kan jou inligting-, privaatheid- en sekuriteitinstellings alles op een plek kry – jou Google-rekening. Ons het nutsgoed geskep wat maklik is om te gebruik, soos Dashboard en My Aktiwiteit, wat vir jou deursigtigheid gee oor data wat uit jou aktiwiteit oral in Google-dienste ingesamel word. Daar is ook kragtige privaatheidkontroles, soos Aktiwiteitkontroles en Advertensie-instellings, wat dit vir jou moontlik maak om die insameling en gebruik van data aan of af te skakel om te besluit hoe alles van Google beter vir jou kan werk.

Jy kan binne net 'n paar minute die soorte data bestuur wat ons insamel, opdateer wat jy met vriende deel of publiek maak, en die soorte advertensies verstel wat jy wil hê ons vir jou moet wys. Jy kan hierdie instellings so gereeld as wat jy wil verander en selfs kies dat onthounotas gereeld gestuur word om jou te help om jou huidige instellings in gedagte te hou.

Die data wat ons in jou rekening stoor, kan Google-dienste vir jou nuttiger maak – van beter pendelroeteopsies in Maps tot vinniger resultate in Search. Deur Aktiwiteitkontroles te gebruik, kan jy besluit watter soorte aktiwiteit met jou rekening geassosieer word om jou ervarings oral in Google-dienste te personaliseer en om die insameling van spesifieke soorte data te onderbreek – soos jou soek- en blaai-aktiwiteit, ligginggeskiedenis en inligting van jou foon, skootrekenaar of tablet af.

My Aktiwiteit is die sentrale plek waar jy alles kan kry wat jy met ons dienste gesoek het, bekyk het en gekyk het. Ons gee vir jou nutsgoed om volgens onderwerp, datum en produk te soek om dit makliker te maak om jou vorige aanlyn aktiwiteit na te gaan. Jy kan spesifieke aktiwiteite of selfs hele onderwerpe wat jy nie met jou rekening geassosieer wil hê nie, permanent uitvee.

Ons maak dit maklik om 'n oorsig van die Google-produkte wat jy gebruik en die data in elkeen van hulle alles op een plek te sien. Jy kan jou Google-aktiwiteit van die afgelope maand nagaan; sien hoeveel e-posse, dokumente en foto's jy het; en antwoorde op vrae oor Gmail-instellings kry. Jy het ook kitstoegang tot relevante produkinstellings en verwante hulpsentrumartikels as jy hulle nodig het.

Jou foto's. Jou e-posse. Jou kontakte. Selfs jou boekmerke. Jy is in beheer van die data wat in jou Google-rekening gestoor word. Dit is hoekom ons Laai Jou Data Af geskep het – sodat jy 'n kopie kan maak, dit kan rugsteun, en dit selfs na 'n ander diens toe kan skuif.

Jy kan data in verskeie formate aflaai vanaf Google-dienste, insluitend Google Foto's, Drive, Kalender, Google Play Musiek en Gmail. Of jy kan daardie data direk na dienste toe uitvoer, insluitend Dropbox, Microsoft OneDrive en Box.

Jy kan persoonlike inligting, soos jou naam, e-posadres en foonnommer, bestuur om ander mense te help om jou in Google-dienste soos Hangouts, Gmail en Foto's te soek en te kontak.

In Advertensie-instellings maak ons dit maklik om te beheer watter data ons gebruik om advertensies vir jou te personaliseer. Dit sluit inligting in wat jy by jou Google-rekening gevoeg het, wat ons vanweë jou aktiwiteit oor jou belangstellings geraai het, en interaksies met ander adverteerders wat met ons saamwerk om advertensies te wys.

Jou aktiwiteit beïnvloed wat ons vir jou wys, maar jy is altyd in beheer. Byvoorbeeld, ons dink dalk jy is 'n sokkeraanhanger omdat jy op YouTube na hoogtepunte van 'n onlangse wedstryd gekyk het, of op Google Search na “sokkervelde in my omgewing” gesoek het. En as jy tyd op 'n vennootadverteerder se werf deurgebring het, kan ons op grond van daardie besoek advertensies voorstel.

Wanneer advertensiepersonalisering aan is, kan jy enige inligting kies – ouderdom en geslag, 'n afgeleide belangstelling of 'n vorige interaksie met 'n adverteerder – meer te wete kom oor hoekom dit gebruik word, dit afskakel, of gepersonaliseerde advertensies heeltemal deaktiveer. Jy sal steeds advertensies sien, maar hulle sal heel waarskynlik minder relevant wees.

Jou aanlyn geskiedenis kan help om jou soekresultate nuttiger te maak, maar soms sal jy dalk privaat wil blaai. As jy byvoorbeeld 'n rekenaar met jou lewensmaat deel, sal jy waarskynlik nie wil hê dat jou blaaigeskiedenis die verjaardaggeskenkverrassing wat jy soek, moet bederf nie. Maak in sulke gevalle 'n incognitovenster op jou rekenaar of mobiele toestel oop om te keer dat Chrome jou blaaigeskiedenis stoor.