'n Eenstopbeheersentrum: Google-rekening
Stephan Micklitz en Jan Hannemann het jare bestee aan die ontwikkeling van nutsgoed wat gebruikers toelaat om te besluit watter data hulle graag met Google deel – en wat hulle eerder vir hulself wil hou
Jan Hannemann
het 'n PhD in rekenaarwetenskap aan die Universiteit van Brits-Columbië in Vancouver verwerf en in 2013 by Google se span in München aangesluit.
Wanneer Stephan Micklitz vir mense sê hy werk vir Google, word hy dikwels gevra “hoekom het jy so baie data nodig?” Sy antwoord: “Data kan Google-produkte vir jou nuttiger maak — soos om jou soekresultate in die regte taal te kry, of om die vinnigste roete huis toe voor te stel. Maar ek wys altyd daarop dat jy kan kies hoe Google jou data berg en of ons dit gebruik om ons produkte vir jou te pasmaak. Mense wil gewoonlik dit self sien voordat hulle my glo!”
“Ons wou die diens personaliseer en die uitleg duideliker maak."
Jan Hannemann
Micklitz werk sedert 2007 by Google. Hy was een van die eerste personeellede in München en het vinnig 'n leierskapsrol ingeneem oor onderwerpe wat verband hou met aanlyn sekuriteit en dataprivaatheid. Micklitz lei sedert 2010 die globale ontwikkeling van verskeie kritieke Google-produkte om aanlyn sekuriteit en privaatheid te verbeter. Hy is van mening dat dit 'n slim skuif deur Google was toe hulle in 2008 dié department se hoofkantoor in Duitsland gevestig het. “Google wou wees waar privaatheid mees indringend bespreek word,” onthou Micklitz.
Baie het sedertdien gebeur. Die belangrikste is dat die Europese Unie se Algemene Databeskermingsregulasie (GDPR) op 25 Mei 2018 van krag geword het. Die ADBR reguleer die gebruik en berging van persoonlike data. Micklitz onthou die oomblik in 2016 toe hy en sy kollegas die eerste keer deur die bewoording van die wet gelees het. “Dit was duidelik dat baie van die kontroles en nutsgoed wat ons gebou het reeds in ooreenstemming met die GDPR was – maar ook dat ons nog werk gehad het om te doen,” onthou hy. Hy loop nou saam met my na die konferensiekamer waar hy sy kollega Jan Hannemann ontmoet.
Stephan Micklitz (links), direkteur van ingenieurswese, is verantwoordelik vir globale privaatheid en sekuriteit by Google. Hy het rekenaarwetenskap aan die Tegniese Universiteit van München gestudeer en werk sedert laat 2007 in Google se München-kantoor.
Google het hul eerste dataprivaatheidnutsding, Google Dashboard, reeds in 2009 bekendgestel. Micklitz en sy spanne was vir die ontwikkeling daarvan verantwoordelik. Oor die jare is bykomende funksies bygevoeg. Vanaf 2013 kon gebruikers hul vorige digitale aktiwiteit op Google bestuur met die Bestuurder vir Onaktiewe Rekeninge; in 2014 is die Sekuriteitkontrole bygevoeg, gevolg deur die Privaatheidskontrole in 2015. Hierdie nutsgoed neem gebruikers stapsgewys deur hul privaatheid- en sekuriteitinstellings.
My Rekening is in 2015 bekendgestel, wat alle Google-dienste saamgebring het. Gebruikers het vir die eerste keer 'n eenstopbeheersentrum gehad waar hulle kon sien watter van hul persoonlike data deur Google geberg word; hul eie besluite kon maak oor watter inligting hulle wou uitvee; en funksies kon afskakel wat data stoor en aanlyn aktiwiteit naspoor. Gebruikers kon ook aan gepersonaliseerde advertensies onttrek. My-rekening word van die oomblik dat dit bekendgestel is voortdurend uitgebrei en verbeter.
“Dit is vir ons belangrik dat elke gebruiker kan kies watter inligting Google mag hou."
Stephan Micklitz
Die diens is In Junie 2018 opgeknap en My Rekening het Google-rekening geword. In samewerking met Stephan Micklitz was die produkbestuurder, Jan Hannemann, vir die herbekendstelling verantwoordelik. Hannemann het 'n PhD in rekenaarwetenskap en werk sedert 2013 in Google se München-kantoor. Hy het gehelp om My Rekening te ontwikkel en is tot vandag toe verantwoordelik vir Google-rekening. Sy kollegas het hom selfs die bynaam “Mr. Google Account” gegee.
Hannemann gebruik sy slimfoon om Google-rekening se nuwe ontwerp te verduidelik. “Ons wou hierdie diens personaliseer en die uitleg duideliker maak – veral vir gebruik op mobiele toestelle met kleiner skerms.” Stephan Micklitz tel sy eie slimfoon op en maak die program oop. “Wanneer ek hierdie diens gebruik, gee die sagteware vir my die opsie om byvoorbeeld 'n Sekuriteitkontrole uit te voer,” verduidelik hy. “Hier kan ek dadelik sien of Google enige voorstelle het oor hoe ek die sekuriteit van my Google-rekening kan verbeter.”
Jan Hannemann (links) is produkbestuurder van Google-rekening, voorheen bekend as My Rekening. Hierdie diens is 'n eenstopbeheersentrum vir gebruikers, wat dit vir hulle moontlik maak om hul sekuriteit en dataprivaatheid na te gaan.
Micklitz en Hannemann grond baie van hulle werk oor produkontwikkeling op Google-opnames oor hoe mense reg oor die wêreld individuele dienste gebruik en wat hul algemene benaderings is. “Europeërs – meer spesifiek Duitsers – is dikwels meer skepties as Amerikaners wanneer dit by die gebruik van hul persoonlike data kom,” sê Hannemann. “Dit het natuurlik met ons geskiedenis te doen.” Nie alle gebruikers is gekant teen die stoor van hul data nie. “Sommige mense vind dit baie prakties wanneer hul slimfoon hulle herinner dat dit tyd is om lughawe toe te gaan,” sê Hannemann. “Ander mense waardeer die outovul-kenmerk wat dit vir die soekenjin moontlik maak om die res van 'n soekterm te voorspel. Hierdie kenmerke en baie ander is slegs moontlik wanneer mense ons toelaat om hul data te gebruik om ons produkte vir hulle te pasmaak.
Wanneer dit kom by privaatheid, merk Stephan Micklitz op, kan daar nooit net een, eenvormige oplossing wees nie. Dit is deels as gevolg van die feit dat almal 'n individu is, en gebruikers se behoeftes oor tyd verander. “Dit is vir ons belangrik dat elke gebruiker kan kies watter inligting Google mag hou. Ons skerp voortdurend ons nutsgoed op om dit moontlik te maak”
Foto's: Conny Mirbach
Kubersekuriteitverbeteringe
Vind uit hoe ons meer mense aanlyn veilig hou as enigiemand anders in die wêreld.
Kom meer te wete