Help kinders om slim, selfversekerde verkenners van die aanlyn wêreld te wees

Ons het hulpbronne en wenke ontwerp om kinders te leer om beter aanlyn besluite te neem en hulle te help om slim, vernuftige digitale burgers te word.

Maak ingeligte aanlyn keuses met hierdie wenke en hulpbronne

  • Help kinders om slim digitale burgers te word met Be Internet Awesome

    Om die beste gebruik van die internet te maak, moet kinders voorberei word om ingeligte besluite te neem. Hierdie program leer kinders die grondbeginsels van digitale burgerskap en veiligheid sodat hulle die aanlyn wêreld met vertroue kan verken. Kinders kan hul weg na internetuitmuntendheid oopspeel met Interland, 'n aanlyn avontuur wat die kernlesse van digitale veiligheid met vier uitdagende speletjies prakties uitvoerbaar maak.

    Ons het hierdie program tot dusver in die VSA en Latyns-Amerika bekend gestel en beplan om dit verder uit te brei na meer markte. Ons het hierdie kurrikulum direk na skole in die VSA geneem as deel van 'n promosietoer vir aanlyn veiligheid om tieners te leer om slim en veilig aanlyn te wees.

Deel oordeelkundig

Goeie (en slegte) nuus versprei vinnig aanlyn, en sonder oorleg kan kinders en tieners hulself in netelige situasies met verreikende gevolge bevind. Ons het wenke geskep wat hulle leer hoe om nuus op 'n gepaste manier met die regte mense te deel.

  • Leer hulle meer oor digitale voetspoor

    Soek saam met jou kinders aanlyn vir jou eie profiel of vir 'n musikant van wie hulle hou, en praat oor wat julle vind. Jy moet dalk vooraf gaan kyk wat die resultate is. Praat oor wat ander mense oor jou te wete kan kom uit hierdie resultate en hoe jy 'n digitale voetspoor aanlyn ontwikkel.

  • Help om sosiale vergelyking te minimaliseer

    Maak seker dat jou kind weet dit wat vriende aanlyn deel, nie die hele storie is nie – dis gewoonlik die hoogtepunte. Herinner hulle daaraan dat almal ook vervelige, hartseer of verleë oomblikke beleef wat hulle nie deel nie.

  • Skep gesinsreëls oor wat om te deel

    Stel vir jou gesin duidelike voorwaardes oor wat hulle nié aanlyn moet deel nie, soos foto's of private inligting. Oefen deur 'n paar foto's saam te neem en praat oor hoe verantwoordelike deling lyk. Moedig byvoorbeeld jou kind aan om goed te dink voordat hulle foto's deel, nie net van hulle nie maar ook van ander mense. Herinner hulle om toestemming te vra as hulle nie seker is nie.

  • Leer hulle meer oor oormatige deling

    Hou 'n dinkskrum oor oplossings vir oormatige deling, soos om inhoud wat gedeel is af te haal of om privaatheidinstellings reg te stel. As dit gebeur, help dit om dinge in perspektief te hou. Sommige verleë oomblikke is ernstig, maar ander is bloot goeie leermomente.

Moenie 'n rat voor die oë gedraai word nie

Dit is belangrik dat jy jou kinders bewus maak daarvan dat mense en situasies aanlyn nie altyd is soos hulle voorkom nie. Ons het nuttige riglyne ontwikkel wat hulle kan help onderskei tussen wat werklik en wat vals is.

  • Verduidelik verpersoonliking

    Verduidelik aan hulle waarom iemand dalk hul wagwoorde of private data sou wou bekom. Met hierdie inligting kan iemand hul rekening gebruik en voorgee dat dit hulle is.

  • Help hulle om uitvissingpogings raak te sien

    Jou kinders sal dalk nie besef dat mense moontlik kan probeer om hulle te mislei om hul persoonlike inligting bekend te maak nie. Leer hulle om jou te raadpleeg as hulle 'n boodskap, skakel of e-pos van 'n vreemdeling kry wat vir rekeninginhoud vra of wat 'n aanhegsel het wat vreemd lyk.

  • Leer hulle om swendelary te herken

    Wys jou kinders daarop dat sekere vindingryke swendelarye lyk of dit van 'n vriend af kom. Selfs kundige volwassenes kan mislei word! As 'n boodskap verdag lyk, moet hulle dit met jou kontroleer. Wen hul vertroue deur op hul bekommernisse te reageer.

  • Kyk saam vir sekuriteitleidrade

    Besoek 'n webwerf saam en kyk vir sekuriteittekens. Is daar 'n hangslot langs die URL of begin dit met https, wat beteken dat dit veilig is? Stem die URL met die werfnaam ooreen? Help om die tekens waarvoor hulle moet oplet wanneer hulle op 'n werf land, uit te wys.

Beveilig jou geheime

Persoonlike privaatheid en sekuriteit is net so belangrik aanlyn as vanlyn. Dit is belangrik dat jou kinders verstaan hoe om hul waardevolle inligting te beveilig om te verhoed dat hul toestelle, reputasies en verhoudings geskend word.

  • Skep wagwoorde wat moeilik is om kraak

    Leer hulle hoe om 'n sterk wagwoord te maak uit 'n frase wat maklik onthou kan word. Gebruik 'n mengsel van minstens agt hoof- en kleinletters en verander party na simbole en syfers. Byvoorbeeld, "My jonger sussie se naam is Annie", word myJ$1Nan. Help hulle om te verstaan wat 'n wagwoord swak maak, soos om jou eie adres, geboortedatum, 123456 of “wagwoord” te gebruik – wat iemand maklik kan raai.

  • Hou hul private inligting privaat

    Praat oor watter inligting hulle privaat moet hou – soos hul huisadres, wagwoorde of die skool wat hulle bywoon. Moedig hulle aan om jou te raadpleeg as hulle sulke inligting gevra word.

  • Leer goeie wagwoordetiket

    Leer hulle om twee keer te dink voordat hulle hul wagwoord enige plek invoer en om seker te maak dat dit die regte program of werf is. Wanneer hulle twyfel, moet hulle met jou kom praat voordat hulle enigiets invoer. Moedig hulle ook aan om verskillende wagwoorde vir verskillende programme en werwe te hê. Hulle kan een hoofwagwoord hê waarby hulle vir elke program 'n paar letters voeg.

  • Help hulle om poetse te vermy

    Herinner hulle dat as hulle hul wagwoord privaat hou, kan hulle ander mense keer om by hul rekeninge in te gaan om vals boodksappe of boodskappe wat vir hulle 'n verleentheid is, te stuur.

Dis goed om gaaf te wees

Die internet is 'n kragtige versterker wat gebruik kan word om positiwiteit of negatiwiteit te versprei. Help jou kinders om onberispelik op te tree deur die konsep van "doen aan ander wat jy aan jouself gedoen wil hê" op hul handelinge aanlyn toe te pas en daardeur ander mense positief te beïnvloed en boeliegedrag te ontmoedig.

  • Skep 'n dialoog rakende aanlyn afknouery

    Praat oor aanlyn teistering of gevalle waar mense aanlyn nutsgoed gebruik om ander mense doelbewus seer te maak. Beplan wie jou kinders sou kon nader as hulle sulke gedrag sien of ervaar. Vra of hulle of hul vriende aanlyn gemeenheid ervaar het. Van die vrae wat jy kan vra, is: Watter vorm het dit aangeneem? Hoe het dit gevoel? Het jy gedink dit was binne jou vermoë om te help om dit te keer deur miskien iemand van 'n gemene opmerking te vertel?

  • Vestig jou aanlyn gesinswaardes

    Maak dit duidelik hoe jy van hulle verwag om aanlyn op te tree. Om ander te behandel soos hulle behandel wil word en aanlyn net dit te sê wat hulle van aangesig tot aangesig sou sê, sal 'n goeie vertrekpunt wees.

  • Praat oor die betekenis agter iemand se woorde en moedig positiwiteit aan

    Praat oor stemtoon en herinner jou kinders dat 'n mens maklik die betekenis van wat iemand aanlyn sê, kan misinterpreteer. Moedig hulle aan om in goeie trou op te tree en om direk met vriende te praat as hulle onseker is oor wat iemand se bedoeling is. Praat oor hoe goed dit voel om positiewe boodskappe aanlyn te stuur en te ontvang. Oorweeg dit dat julle saam een van jou eie programme gebruik om 'n positiewe opmerking of boodskap te stuur.

As jy twyfel, praat dit uit.

Een les wat enige en alle digitale ervarings geld, is: Wanneer jou kinders iets twyfelagtig teëkom, moet hulle die vrymoedigheid hê om dit te bespreek met 'n volwassene wat hulle vertrou. Jy kan hierdie gedrag ondersteun deur openlike kommunikasie by die huis aan te moedig.

  • Bespreek wat hulle aanlyn doen

    Spandeer tyd om te praat oor hoe jou gesin tegnologie gebruik. Toon belangstelling in die proramme wat jou kinders die meeste gebruik en vra vir 'n toer daardeur. Vind uit hoe hulle hul programme gebruik en wat laat hulle daarvan hou.

  • Stel limiete wat met verloop tyd kan verander

    Stel reëls vir jou kinders se rekeninge, soos inhoudfilters en tydlimiete, en laat jou kinders weet dit kan verander namate hulle ouer word. Instellings behoort met verloop van tyd te ontwikkel. Moenie dit net "stel en los nie".

  • Help hulle om mense te identifiseer tot wie hulle hulle kan wend

    Identifiseer drie vertroude mense na wie hulle kan gaan as goed wat hulle aanlyn teëkom hulle ongemaklik laat voel. 'n Vertroude persoon kan hulle help om dit wat hulle gesien het, te verwerk en te verhoed dat hulle meer sulke goed in die toekoms sien.

  • Ondersteun gehaltetyd aanlyn

    Moedig hulle aan om deel te neem aan speletjies en programme wat hulle kreatiwiteit en probleemoplossingvaardighede leer.

Kom meer te wete oor ons veiligheidswerk

Jou veiligheid

Ons beskerm jou aanlyn met sekuriteit wat die toon aangee in die bedryf.

Jou privaatheid

Ons bou privaatheid wat vir almal werk.

Vir gesinne

Ons help jou om te bestuur wat aanlyn reg is vir jou gesin.