ఆన్‌లైన్‌లో సురక్షితంగా ఉంచడంలో
సహాయపడటానికి టూల్స్, చిట్కాలు.

స్కామ్ చేసే వారు తమ స్కామ్‌లను చట్టబద్ధమైన మెసేజ్‌ల రూపంలో పంపడం ద్వారా సదరు చట్టబద్ధ సంస్థలకు లేదా వ్యక్తులకు ఉన్న పేరు ప్రతిష్ఠలను ఆసరాగా చేసుకుని మిమ్మల్ని మోసం చేయవచ్చు. స్కామ్ చేసే వారు మిమ్మల్ని మోసం చేయడానికి ఇమెయిల్స్, టెక్స్ట్ మెసేజ్‌లు, ఆటోమేటిక్ కాల్స్‌తో పాటు, హానికరమైన సాఫ్ట్‌వేర్‌ను కలిగిన వెబ్‌సైట్‌లను కూడా ఉపయోగించవచ్చు.

ఫిషింగ్ అనేది పాస్‌వర్డ్ లేదా బ్యాంక్ వివరాల వంటి కీలకమైన వ్యక్తిగత లేదా ఆర్థిక సమాచారాన్ని బహిర్గతం చేసేలా మిమ్మల్ని మోసగించే ఒక ప్రయత్నం. ఇది నకిలీ లాగిన్ పేజీ వంటి అనేక రూపాలలో ఉండవచ్చు. ఫిషింగ్ బారిన పడకుండా ఉండటానికి, అనుమానాస్పద లింక్‌లపై ఎప్పుడూ క్లిక్ చేయవద్దు; వెబ్‌సైట్ లేదా యాప్ చట్టబద్ధమైనదని నిర్ధారించుకోవడానికి - లింక్‌పై మౌస్ కర్సర్‌ను ఉంచడం ద్వారా లేదా మొబైల్‌లో టెక్స్ట్‌ను ఎక్కువసేపు నొక్కి, ఉంచడం ద్వారా - URLను ఒకటికి రెండుసార్లు చెక్ చేయండి; అలాగే URL అనేది “https”తో ప్రారంభమవుతోందని నిర్ధారించుకోండి.

స్కామ్ చేసే వారు ప్రభుత్వ లేదా లాభాపేక్ష రహిత సంస్థల వంటి చట్టబద్ధమైన సంస్థలుగా నటిస్తారు. అధికారిక రిసోర్స్ అని క్లెయిమ్ చేసే వారి నుండి వచ్చిన మెసేజ్‌లను చదివేటప్పుడు ఎల్లప్పుడూ జాగ్రత్తగా ఉండండి. మీకు తెలిసిన వారు ఎవరైనా మీకు ఇమెయిల్ పంపినప్పుడు, ఆ మెసేజ్ అసాధారణమైనదిగా కనిపిస్తే, వారి ఖాతా హ్యాక్ చేయబడి ఉండవచ్చు. మీకు వచ్చిన ఇమెయిల్ మోసపూరితమైనది కాదు అని నిర్ధారించుకునే వరకు, మెసేజ్‌కు రిప్లయి ఇవ్వవద్దు లేదా ఏవైనా లింక్‌లను క్లిక్ చేయవద్దు. డబ్బు కోసం చేసే అత్యవసర రిక్వెస్ట్‌ల పట్ల, విదేశాలలో చిక్కుకుపోయాం అంటూ వచ్చే దీన గాథల పట్ల లేదా తన ఫోన్ దొంగతనానికి గురయిందని, కాల్ చేయలేని పరిస్థితిలో ఉన్నాను అని క్లెయిమ్ చేసే వ్యక్తుల పట్ల జాగ్రత్తగా ఉండండి.

అపరిచితుల నుండి వచ్చిన మెసేజ్‌లు అనుమానాస్పదంగా ఉండవచ్చు, అలాగే మీకు విశ్వసనీయమైన బ్యాంక్ లాగా నటిస్తూ వేరే వారి దగ్గర నుండి వచ్చే కమ్యూనికేషన్ కూడా ఒక వంచన కావచ్చు. వ్యక్తిగత సమాచారం గురించి అడిగే అనుమానాస్పద ఇమెయిల్‌లు, ఇన్‌స్టంట్ మెసేజ్‌లు లేదా పాప్-అప్ విండోలకు రిప్లయి ఇవ్వవద్దు. అనుమానాస్పద లింక్‌లను ఎప్పుడూ క్లిక్ చేయవద్దు లేదా సందేహాస్పద ఫారమ్‌లలో లేదా సర్వేలలో వ్యక్తిగత సమాచారాన్ని ఎంటర్ చేయవద్దు. ఒక లాభాపేక్ష రహిత సంస్థ, మిమ్మల్ని విరాళం అడిగితే, మీకు పంపిన లింక్‌పై క్లిక్ చేయకుండా నేరుగా సదరు సంస్థ వెబ్‌సైట్‌లోకి వెళ్లి విరాళం ఇవ్వండి.

కొన్ని అధునాతన ఫిషింగ్ దాడులు, వైరస్ సోకిన డాక్యుమెంట్‌లు, PDF అటాచ్‌మెంట్‌ల ద్వారా జరగవచ్చు. మీకు అనుమానాస్పద అటాచ్‌మెంట్ కనిపిస్తే, దాన్ని తెరవడానికి Chrome లేదా Google Driveను ఉపయోగించండి. మేము ఫైల్‌ను ఆటోమేటిక్‌గా స్కాన్ చేస్తాము, ఒకవేళ మేము వైరస్‌ను గుర్తించినట్లయితే మిమ్మల్ని హెచ్చరిస్తాము.