ஆன்லைனில் பாதுகாப்பாக இருக்க உங்களுக்கு உதவும்
கருவிகளும் உதவிக்குறிப்புகளும்.

மோசடி செய்பவர்கள் நம்பகமான செய்தி என்ற போர்வையில் நல்லெண்ணத்தை ஏற்படுத்தி மோசடி செய்ய முயலலாம். மோசடி செய்பவர்கள் மின்னஞ்சல்கள் மட்டுமல்லாது மெசேஜ்கள், தானியங்கு அழைப்புகள், தீங்கிழைக்கும் இணையதளங்கள் போன்றவற்றைப் பயன்படுத்தியும் உங்களை ஏமாற்றக்கூடும்.

ஃபிஷிங் என்பது கடவுச்சொல், பேங்க் விவரங்கள் போன்ற முக்கியமான தனிப்பட்ட அல்லது நிதி சார்ந்த தகவல்களைத் தெரிந்து கொள்வதற்காக உங்களை ஏமாற்ற முயலும் செயலாகும். இது பலவிதங்களில் நிகழலாம் (எ.கா. போலியான உள்நுழைவுப் பக்கம்). ஃபிஷிங்கில் இருந்து உங்களைப் பாதுகாத்துக் கொள்ள, சந்தேகத்திற்குரிய இணைப்புகளை ஒருபோதும் கிளிக் செய்ய வேண்டாம். URL இணைப்பின் மீது கர்சரைக் கொண்டு சென்றோ மொபைலில் இணைப்பை நீண்டநேரம் அழுத்தியோ ஓர் இணையதளமோ ஆப்ஸோ நம்பகமானதுதானா என்பதை உறுதிப்படுத்திக் கொள்ளுங்கள். மேலும் URL இணைப்பு "https" என்று தொடங்க வேண்டும்.

மோசடி செய்பவர்கள் தங்களை நம்பகமான நிறுவனங்களைப் போல் காட்டிக் கொள்ளக்கூடும் (எ.கா. அரசாங்கம், லாப நோக்கமற்ற நிறுவனங்கள்). அதிகாரப்பூர்வ மூலம் எனக் குறிப்பிட்டு அனுப்பப்படும் செய்திகளைப் படிக்கும்போது எப்போதுமே கவனமாகத் தொடருங்கள். உங்களுக்குத் தெரிந்த ஒருவர் அனுப்பிய மின்னஞ்சல் செய்தி வழக்கத்திற்கு மாறாக இருந்தால் அவரது கணக்கு ஹேக் செய்யப்பட்டிருக்கலாம். மின்னஞ்சல் நம்பகமானது என்பதை உறுதிப்படுத்தும் வரை, செய்திக்குப் பதிலளிக்க வேண்டாம் அல்லது எந்த இணைப்புகளையும் கிளிக் செய்ய வேண்டாம். அவசரமாகப் பணம் வேண்டும் என்று தெரிவிப்பது, வேறு நாட்டில் சிக்கித் தவிப்பதாகத் தெரிவிப்பது, தனது மொபைல் தொலைந்துவிட்டதாகவும் அதற்கு அழைப்பைச் செய்ய முடியவில்லை எனவும் கூறுவது போன்றவை எச்சரிக்கை அறிகுறிகளாகும்.

தெரியாதவர்களிடமிருந்து பெறப்படும் செய்திகள் சந்தேகத்திற்குரியதாக இருக்கலாம். நம்பகமானவர்களிடம் இருந்து (எ.கா. உங்கள் பேங்க்) செய்திகளைப் பெற்றிருந்தாலும் அது ஆள்மாறாட்டமாக இருக்கலாம். உங்கள் தனிப்பட்ட தகவல்களைக் கோரும் சந்தேகத்திற்குரிய மின்னஞ்சல்கள், உடனடிச் செய்திகள் அல்லது பாப்-அப் சாளரங்களுக்குப் பதிலளிக்க வேண்டாம். சந்தேகத்திற்குரிய இணைப்புகளை ஒருபோதும் கிளிக் செய்ய வேண்டாம், மேலும் கேள்வி பதில் வடிவிலான படிவங்கள் அல்லது கருத்துக்கணிப்புகளில் உங்கள் தனிப்பட்ட தகவல்களை உள்ளிட வேண்டாம். லாப நோக்கமற்ற நிறுவனத்துக்கு நன்கொடை அளிக்கும்படி கேட்டால் அந்நிறுவனத்தின் இணையதளத்திற்கு நேரடியாகச் சென்று நன்கொடையளியுங்கள். உங்களுக்கு அனுப்பப்பட்ட இணைப்பைக் கிளிக் செய்ய வேண்டாம்.

பாதிக்கப்பட்ட ஆவணங்கள் மற்றும் PDF இணைப்புகள் மூலம் சில அதிநவீன ஃபிஷிங் தாக்குதல்கள் ஏற்படலாம். சந்தேகத்திற்குரிய இணைப்பைக் கண்டறிந்தால் Chrome அல்லது Google Drive பயன்படுத்தி அதைத் திறந்திடுங்கள். ஃபைலை நாங்கள் தானாகவே ஸ்கேன் செய்து, வைரஸ் இருந்தால் அதுகுறித்து உங்களுக்கு எச்சரிப்போம்.