എല്ലാവർക്കും അനുയോജ്യമായ സ്വകാര്യതയും സുരക്ഷയും സൃഷ്ടിക്കുന്നു

സ്വകാര്യതാ, സുരക്ഷാ എഞ്ചിനീയറിംഗിനുള്ള ആഗോള ഹബ് ആണ് മ്യൂണിക്കിലെ Google സുരക്ഷാ എഞ്ചിനീയറിംഗ് കേന്ദ്രം. Google അതിന്റെ ഉൽപ്പന്നങ്ങളിൽ സുതാര്യതയും നിയന്ത്രണവും സൃഷ്ടിക്കുന്നത് എങ്ങനെയെന്ന് എഞ്ചിനീയർമാരായ വീലൻഡ് ഹോൾഫെഡറും സ്റ്റെഫാൻ മിക്‌ലിറ്റ്സും വിശദീകരിക്കുന്നു.

Google-ലെ പുതിയ ജോലിക്കുള്ള ഔദ്യോഗിക കത്ത് ലഭിക്കുമ്പോൾ വീലൻഡ് ഹോൾഫെഡർ യുഎസിൽ താമസിക്കുകയായിരുന്നു. ജർമ്മനിയിൽ നിന്ന് സിലിക്കൺ വാലിയിലേക്ക് താമസം മാറിയ ഹോൾഫെഡർ Mercedes-Benz ഉൾപ്പെടെയുള്ള കമ്പനികളിൽ 12 വർഷമായി ജോലി ചെയ്തുവരികയായിരുന്നു. 2008-ൽ എല്ലാം മാറി. ഹോൾഫെഡറിന് ലഭിച്ച പുതിയ ജോലിയെയും സ്ഥാപനത്തെയും കുറിച്ച് അമേരിക്കയിലുള്ള സുഹൃത്തുക്കളും സഹപ്രവർത്തകരുമെല്ലാം ആവേശഭരിതരായിരുന്നു. എന്നാൽ അദ്ദേഹത്തിന്റെ ജോലിസ്ഥലം കാലിഫോർണിയയിലെ മൗണ്ടൻ വ്യൂ ആയിരുന്നില്ല – അത് ജർമ്മനിയിലെ മ്യൂണിക്ക് ആയിരുന്നു. ആ വാർത്ത അത്ര താൽപ്പര്യത്തോടെയല്ല അദ്ദേഹത്തിന്റെ സുഹൃത്തുക്കൾ സ്വീകരിച്ചത്. അഭിനന്ദനമറിയിച്ചുള്ള സാധാരണ സന്ദേശങ്ങൾക്ക് പുറമെ, “Google” എന്ന് പരാമർശിക്കുമ്പോഴെല്ലാം ജർമ്മൻ സുഹൃത്തുക്കളിൽ നിന്ന് തണുപ്പൻ പ്രതികരണവും ചോദ്യങ്ങളും നേരിടേണ്ടി വന്നു. എന്നാൽ ഡാറ്റയുടെ കാര്യത്തിൽ യൂറോപ്യന്മാർ – പ്രത്യേകിച്ച് ജർമ്മനിയിലുള്ളവർ – എത്രമാത്രം സെൻസിറ്റീവ് ആണെന്ന് ഹോൾഫെഡറിന് അറിയാമായിരുന്നു.

Google-ന്റെ എഞ്ചിനീയറിംഗ് കേന്ദ്രത്തിന്റെ സൈറ്റ് തലവനായ ഹോൾഫെഡർ, മ്യൂണിക്ക് ഓഫീസിലെ കാന്റീനിൽ ഇരിക്കുന്നു, മനോഹരമായ അലങ്കാരവും ഫ്ലോർ മുതൽ സീലിംഗ് വരെ ജനാലകളാൽ നിറഞ്ഞതുമായ കാന്റീൻ, റെസ്റ്റോറന്റ് പോലെ തന്നെയാണ്. കാന്റീനിൽ നിന്ന് കേൾക്കുന്ന സംഭാഷണ ശകലങ്ങളിൽ നിന്ന് മ്യൂണിക്കിലെ “Googler-മാർ” ആശയവിനിമയം നടത്താനുപയോഗിക്കുന്ന ഭാഷ ഇംഗ്ലീഷ് ആണെന്ന് വ്യക്തമാണ്. സിലിക്കൺ വാലിയിൽ നിന്നുള്ള സ്വാധീനം അവിടെ തീരുന്നില്ല – 2016-ൽ തുറന്നുപ്രവർത്തിച്ച ഇഷ്ടിക കെട്ടിടത്തിന് പുറമെ വീടുകൾ, ഫിറ്റ്‌നസ് സ്റ്റുഡിയോ, കോഫി ബാർ, ബില്ല്യാർഡ് റൂം, ലൈബ്രറി എന്നിവയും പ്രവർത്തനമാരംഭിച്ചു. ലോകത്തെല്ലായിടത്തുനിന്നുമുള്ള 750-ഓളം ജീവനക്കാർ ഈ ശാഖയിൽ ജോലി ചെയ്യുന്നു, അവരിലധികവും സോഫ്‌റ്റ്‌വെയർ ഡെവലപ്പർമാരാണ്. മൗണ്ടൻ വ്യൂവിലെ Google-ന്റെ ആസ്ഥാനത്ത് സഹപ്രവർത്തകരുമായി നടക്കുന്ന വീഡിയോ കോൺഫറൻസുകളെല്ലാം വൈകീട്ടോടെ മാത്രമേ സാധ്യമാകൂ എന്നതിനാൽ അവരുടെ പ്രവർത്തന സമയം വൈകുന്നേരം കഴിഞ്ഞും നീളും.

ഡയറക്‌ടർ ഓഫ് എഞ്ചിനീയറിംഗ് സ്റ്റെഫാൻ മിക്‌ലിറ്റ്സ്, ആഗോളതലത്തിൽ Google ഉൽപ്പന്നങ്ങളുടെ ഡാറ്റാ സ്വകാര്യതാ മാനദണ്ഡങ്ങളുടെ ഉത്തരവാദിത്തമുള്ള അദ്ദേഹവും മ്യൂണിക്ക് ഓഫീസിലാണ് ജോലി ചെയ്യുന്നത്. 2007-ൽ ടീമിന്റെ ഭാഗമായ അദ്ദേഹം ഒറിജിനൽ മ്യൂണിക്ക് Googler-മാരിൽ ഒരാളാണ്. ഇപ്പോൾ Google അക്കൗണ്ട് എന്നറിയപ്പെടുന്ന യഥാർത്ഥ 'എന്റെ അക്കൗണ്ട്' സേവനം വികസിപ്പിച്ചത് മിക്‌ലിറ്റ്‌സും ടീമുമാണ്. Google അക്കൗണ്ടുള്ളവർക്കും Google-ന്റെ തിരയൽ യന്ത്രം അല്ലെങ്കിൽ YouTube മാത്രം ഉപയോഗിക്കുന്നവർക്കും ഈ ഡിജിറ്റൽ കോക്ക്‌പിറ്റ് ഉപയോഗിക്കാം. Google അക്കൗണ്ട് ഉപയോഗിച്ച് ക്രമീകരണം എളുപ്പത്തിൽ മാനേജ് ചെയ്യാം. പുറത്തുനിന്നുള്ള ആക്രമണത്തിൽ നിന്ന് ഉപയോക്താക്കളുടെ ഡാറ്റ എത്രത്തോളം മികച്ച രീതിയിലാണ് പരിരക്ഷിച്ചിരിക്കുന്നത് എന്നറിയാൻ അവർക്ക് സുരക്ഷാ പരിശോധന നടത്താം, Google സെർവറുകളിൽ ഏതൊക്കെ വ്യക്തിപര വിവരങ്ങൾ സംഭരിക്കണമെന്നും ഏതൊക്കെ സംഭരിക്കേണ്ടെന്നും തീരുമാനിക്കാൻ സ്വകാര്യതാ പരിശോധന ഉപയോഗിക്കാം.

ഹോൾഫെഡറിന്റെയും മിക്‌ലിറ്റ്സിന്റെയും അഭിപ്രായത്തിൽ, ഓൺലൈൻ ആക്രമണങ്ങളിൽ നിന്ന് ഉപയോക്താക്കളെ പരിരക്ഷിക്കാൻ ഈ മേഖലയിലെ മറ്റൊരു കമ്പനിയും ഇത്രയധികം കാര്യങ്ങൾ ചെയ്യുന്നില്ല. Google-ന്റെ സെർവർ ആന്തരഘടന ലോകത്തിലെ ഏറ്റവും സുരക്ഷിതമായ ഘടനയായി കണക്കാക്കപ്പെടുന്നു എന്നത് സത്യമാണ്. നിരവധി തലങ്ങളടങ്ങിയ, സങ്കീർണ്ണമായ സുരക്ഷാ സംവിധാനമാണത്. ലോകമെമ്പാടുമുള്ള ഡാറ്റാ കേന്ദ്രങ്ങളിൽ എൻക്രിപ്റ്റ് ചെയ്ത രൂപത്തിലാണ് ഡാറ്റ സംഭരിച്ചിരിക്കുന്നത് – പരമാവധി സുരക്ഷയുള്ള ജയിലുകൾക്ക് സമാനമാണിത്. “ബയോമെട്രിക് പരിരക്ഷയുള്ള, ഞങ്ങളുടെ ഡാറ്റാ കേന്ദ്രങ്ങളിലുള്ള ആരെങ്കിലും നിങ്ങളുടെ ഇമെയിലുകൾ അടങ്ങുന്ന ഹാർഡ് ഡ്രൈവ് കണ്ടെത്തുകയാണെങ്കിലും അവർക്കത് ഉപയോഗിച്ച് ഒന്നും ചെയ്യാൻ കഴിയില്ല,” ഹോൾഫെഡർ വിശദീകരിക്കുന്നു. “അതിലുള്ള എല്ലാ വിവരങ്ങളും വ്യത്യസ്ത ഡാറ്റാ കേന്ദ്രങ്ങളിലായി വിതരണം ചെയ്തിരിക്കുന്നു – അത് എൻക്രിപ്റ്റും ചെയ്തിട്ടുണ്ട്.” കൂടാതെ, ഈ സുരക്ഷാനടപടികൾക്കിടയിലും Google-ന്റെ ഇന്റർഫേസുകളിലോ ഉൽപ്പന്നങ്ങളിലോ ഹാക്കർമാർ എന്തെങ്കിലും പാളിച്ച കണ്ടെത്തുകയാണെങ്കിൽ ഈ വിവരങ്ങൾക്ക് പകരമായി കമ്പനി വലിയ പാരിതോഷികങ്ങൾ വാഗ്ദാനം ചെയ്യുന്നു. അതിനാൽ ഭാവിയിൽ സൈബർ ആക്രമണത്തിന് പദ്ധതിയിടുന്നവർ എന്തെങ്കിലും സുരക്ഷാ വീഴ്ച കണ്ടെത്തിയാൽ അത് ചൂഷണം ചെയ്യുന്നതിനേക്കാൾ റിപ്പോർട്ട് ചെയ്യുന്നതായിരിക്കും കൂടുതൽ പ്രയോജനകരം.

Google ഏറ്റവും കൂടുതൽ വരുമാനം ഉണ്ടാക്കുന്ന പരസ്യങ്ങളുടെ കാര്യത്തിലും ഇത് ഇങ്ങനെ തന്നെയാണ്. കൂടുതൽ പ്രസക്തമായ പരസ്യങ്ങൾ കാണിക്കാൻ ഡാറ്റ സഹായിക്കുന്നു -- നിങ്ങൾ ചാരനിറത്തിലുള്ള പുതിയ സോഫ തിരയുകയാണെങ്കിൽ, അത് കണ്ടെത്താൻ സഹായിക്കുന്ന പരസ്യങ്ങൾ നിങ്ങൾ കാണുന്നു. ചില ഉപയോക്താക്കൾക്ക് ഇത് ഉപയോഗപ്രദമായി തോന്നാം; മറ്റ് ചിലരെ ഇത് അലോസരപ്പെടുത്തിയേക്കാം. പരസ്യങ്ങൾ വ്യക്തിപരമാക്കുന്ന ഈ ഫീച്ചർ ഓഫാക്കാനാകുമെന്നും മിക്‌ലിറ്റ്സ് പറയുന്നു. “തീർച്ചയായും Google അക്കൗണ്ട് വഴി,” അദ്ദേഹം കൂട്ടിച്ചേർത്തു. ഈ ഫീച്ചർ ഓഫാക്കുന്ന ഉപയോക്താക്കൾ പരസ്യങ്ങൾ തുടർന്നും കാണുമെങ്കിലും അവരുടെ താൽപ്പര്യത്തിനിണങ്ങിയ പരസ്യങ്ങൾ പിന്നീടങ്ങോട്ട് കാണില്ല. “ഉപയോക്താക്കൾക്ക് കൂടുതൽ പ്രസക്തമായ പരസ്യങ്ങൾ നൽകുന്നതിന് ഞങ്ങൾ ഡാറ്റ ഉപയോഗിക്കുന്നു,” ഹോൾഫെഡർ കൂട്ടിച്ചേർത്തു. “എന്നാൽ വ്യക്തിപരമായ ഡാറ്റയൊന്നും ഞങ്ങൾ വിൽക്കില്ല.”

ഫോട്ടോഗ്രാഫുകൾ: മിർസിക്, ജാരിഷ്