Google നിങ്ങളുടെ ഡാറ്റ സുരക്ഷിതമായി സൂക്ഷിക്കുന്നത് എങ്ങനെ

ഹാക്കിംഗും ഫിഷിംഗും മുതൽ മാൽവെയർ വരെയുള്ള വ്യത്യസ്തമായ രീതികളാണ് സൈബർ കുറ്റവാളികൾ ഉപയോക്തൃ അക്കൗണ്ടുകൾ അപഹരിക്കാൻ ഉപയോഗിക്കുന്നത്. കുറ്റവാളികളെ തടയുന്ന കാര്യം Google-ന്റെ സ്റ്റെഫാൻ മിക്‌ലിറ്റ്സും ടാഡെക് പിയട്രസെകും ഉറപ്പുവരുത്തുന്നു.

പിയട്രസെക്, ഉപയോക്തൃ അക്കൗണ്ടുകൾ സുരക്ഷിതമായി സൂക്ഷിക്കുന്നതിനുള്ള ഉത്തരവാദിത്തം നിങ്ങൾക്കും നിങ്ങളുടെ ടീമിനുമാണ്. ആക്‌സസ് നേടുന്നതിൽ നിന്ന് ഹാക്കർമാരെ നിങ്ങൾ എങ്ങനെയാണ് തടയുന്നത്?

ടാഡെക് പിയട്രസെക് ഉപയോക്തൃ അക്കൗണ്ട് സുരക്ഷയ്‌ക്കുള്ള പ്രധാന സോഫ്‌റ്റ്‌വെയർ എഞ്ചിനീയർ: പ്രാഥമിക ആക്രമണം തിരിച്ചറിയാനാകുക എന്നതാണ് ഏറ്റവും പ്രധാനപ്പെട്ട കാര്യം. സംശയകരമായ ആക്റ്റിവിറ്റി കണ്ടെത്താൻ ഞങ്ങൾ നൂറിലധികം ഘടകങ്ങൾ ഉപയോഗിക്കുന്നു. നിങ്ങൾ ജർമ്മനിയിലാണ് താമസിക്കുന്നതെന്നും വളരെ അപൂർവ്വമായേ വിദേശയാത്രകൾ നടത്താറുള്ളൂവെന്നും കരുതുക, അതിനിടെ മറ്റൊരു രാജ്യത്തുനിന്ന് ആരെങ്കിലും നിങ്ങളുടെ അക്കൗണ്ട് ആക്‌സസ് ചെയ്യാൻ ശ്രമിക്കുന്നു – ഇത് ആശങ്കാവഹമാണ്.

സ്‌റ്റെഫാൻ മിക്‌ലിറ്റ്‌സ്, Google-ന്റെ സ്വകാര്യതാ, സുരക്ഷാ ടീമിലെ എഞ്ചിനീയറിംഗ് ഡയറക്‌ടർ: അതിനാലാണ് നിങ്ങൾ ഞങ്ങൾക്ക് നൽകിയിരിക്കുന്ന ഫോൺ നമ്പറോ അക്കൗണ്ട് ഉടമയെന്ന നിലയിൽ നിങ്ങൾക്ക് മാത്രം അറിയാവുന്ന മറ്റ് വിവരങ്ങളോ സ്ഥിരീകരിക്കാൻ ഞങ്ങൾ ചിലപ്പോൾ ആവശ്യപ്പെടുന്നത്.

എത്ര ഇടവിട്ടാണ് ഈ ആക്രമണങ്ങൾ സംഭവിക്കുന്നത്?

പിയട്രസെക്: ദിവസേന ആയിരക്കണക്കിന് സൈബർ ആക്രമണങ്ങൾ സംഭവിക്കുന്നുണ്ട്. ഹാക്ക് ചെയ്യപ്പെട്ട വെബ്‌സൈറ്റുകളിൽ നിന്ന് മോഷ്ടിച്ച ഉപയോക്തൃ നാമങ്ങളുടെയും പാസ്‌വേഡുകളുടെയും എണ്ണമറ്റ ലിസ്റ്റുകൾ ഇന്റർനെറ്റിലുണ്ടെന്നതാണ് ഞങ്ങൾ നേരിടുന്ന ഏറ്റവും വലിയ പ്രശ്നം. ഞങ്ങളുടെ നിരവധി ഉപയോക്താക്കൾ വ്യത്യസ്ത അക്കൗണ്ടുകൾക്ക് ഒരേ പാസ്‌വേഡ് ഉപയോഗിക്കുന്നതിനാൽ ഈ ലിസ്റ്റുകളിൽ Google അക്കൗണ്ട് ലോഗിൻ ഡാറ്റയും ഉൾപ്പെടുന്നു.

ഈ ലിസ്റ്റുകൾ ആണോ ഏറ്റവും വലിയ സുരക്ഷാ ഭീഷണി?

പിയട്രസെക്: അതെ, തീർച്ചയായും. കൂടാതെ ക്ലാസിക് ഫിഷിംഗ് ആക്രമണങ്ങളും. അക്കൗണ്ട് പാസ്‌വേഡുകൾ നേടാൻ ശ്രമിക്കുന്ന കുറ്റവാളികളിൽ നിന്നുള്ള ഇമെയിലുകൾ ഏകദേശം എല്ലാവർക്കും ലഭിച്ചിട്ടുണ്ടാകും. സ്വാഭാവികമായും, അത്തരം കുറ്റവാളികളെ തടയാൻ ഞങ്ങൾക്ക് കഴിയുന്നത് ഞങ്ങൾ ചെയ്യുന്നുണ്ട്. നിങ്ങളുടെ Gmail ഇൻബോക്‌സിലേക്ക് അയയ്‌ക്കുന്ന ഇമെയിൽ സംശയകരമെന്ന് തോന്നിയാൽ, അതിൽ മുന്നറിയിപ്പ് അടയാളപ്പെടുത്താൻ ഞങ്ങൾക്ക് കഴിയും, ഇതുവഴി നിങ്ങൾക്ക് വിശദമായി പരിശോധിക്കാനോ ഞങ്ങൾക്കത് സ്വയമേവ ഫിൽട്ടർ ചെയ്ത് ഒഴിവാക്കാനോ കഴിയും. ഫിഷിംഗ് വെബ്‌സൈറ്റാണെന്ന് ഞങ്ങൾക്ക് അറിയാവുന്ന സൈറ്റ് നിങ്ങൾ സന്ദർശിക്കുമ്പോൾ ഞങ്ങളുടെ Chrome ബ്രൗസറും മുന്നറിയിപ്പുകൾ അയയ്‌ക്കുന്നു.

മിക്‌ലിറ്റ്സ്: രണ്ട് അടിസ്ഥാന തരത്തിലുള്ള ഫിഷിംഗ് ഉണ്ട്. കുറ്റവാളികൾ അവർക്ക് കഴിയാവുന്നത്ര ലോഗിൻ ഡാറ്റ ശേഖരിക്കാൻ ഉപയോഗിക്കുന്ന കൂട്ട ഇമെയിലുകളാണ് ഒരു രീതി, നിർദ്ദിഷ്ട വ്യക്തിയുടെ അക്കൗണ്ട് ലക്ഷ്യം വയ്‌ക്കുന്ന രീതിയായ “സ്‌പിയർ ഫിഷിംഗ്” ആണ് മറ്റൊന്ന്. നിരവധി മാസം നീണ്ടുനിൽക്കുന്ന തീർത്തും സങ്കീർണ്ണമായ പ്രക്രിയകളാണ് ഇവ, ഈ കാലയളവിൽ കുറ്റവാളികൾ ഇരയുടെ ജീവിതം വിശദമായി പരിശോധിച്ച് വളരെ ടാർഗറ്റ് ചെയ്തുള്ള ആക്രമണം ആരംഭിക്കും.

പ്രധാന സൈബർ ആക്രമണത്തെയും അതിനോട് നിങ്ങൾ പ്രതികരിച്ച രീതിയെയും കുറിച്ച് ഞങ്ങളോട് സംസാരിക്കാമോ?

പിയട്രസെക്: 2017-ന്റെ തുടക്കത്തിൽ അത്തരമൊരു ആക്രമണം നടന്നു. ഇരകളുടെ Google അക്കൗണ്ടുകളിലേക്ക് ആക്‌സസ് നേടാൻ ഹാക്കർമാർ ദോഷകരമായ പ്രോഗ്രാം സൃഷ്ടിച്ച് ഉപയോക്താക്കളുടെ കോൺടാക്റ്റുകളിലേക്ക് വ്യാജ ഇമെയിലുകൾ അയച്ചു. ഈ ഇമെയിലുകളിൽ, സ്വീകർത്താക്കളോട് വ്യാജ Google ഡോക്യുമെന്റിലേക്ക് ആക്‌സസ് നൽകാൻ ആവശ്യപ്പെട്ടു. ആക്‌സസ് നൽകിയവർ, മാൽവെയറിലേക്ക് മനപ്പൂർവ്വമല്ലാതെ ആക്‌സസ് അനുവദിക്കുകയും അവരുടെ കോൺടാക്റ്റുകളിലേക്ക് ഇതേ വ്യാജ ഇമെയിലുകൾ അയയ്‌ക്കുകയും ചെയ്തു. വൈറസ് അതിവേഗം വ്യാപിച്ചു. ഇത്തരം സാഹചര്യങ്ങൾ നേരിടാൻ ഞങ്ങളുടെ പക്കൽ പദ്ധതികളുണ്ട്.

മിക്‌ലിറ്റ്സ്: ഉദാഹരണത്തിന് ഈ പ്രത്യേക സാഹചര്യത്തിൽ, Gmail-ൽ ഈ ഈമെയിലുകളുടെ വിതരണം ഞങ്ങൾ തടയുകയും പ്രോഗ്രാമിന് നൽകിയ ആക്‌സസ് റദ്ദാക്കുകയും അക്കൗണ്ടുകൾ സുരക്ഷിതമാക്കുകയും ചെയ്തു. ഭാവിയിൽ സമാനതരത്തിലുള്ള ആക്രമണങ്ങൾ സംഭവിക്കാതിരിക്കാൻ ഞങ്ങൾ ചിട്ടയായ സംരക്ഷണം ചേർക്കുകയും ചെയ്തു. Google അക്കൗണ്ടുകൾ നിരന്തരം ആക്രമണങ്ങൾക്ക് വിധേയമാകുന്നു, സ്വയമേവ പ്രവർത്തിക്കുന്ന ഞങ്ങളുടെ സിസ്റ്റങ്ങൾ ഏറ്റവും ഫലപ്രദമായ പരിരക്ഷ നൽകുകയും ചെയ്യുന്നു. ഞങ്ങളുടെ ഉപയോക്താക്കളെ അവരുടെ Google അക്കൗണ്ടിലൂടെ അല്ലാതെ മറ്റ് മാർഗ്ഗങ്ങളിലൂടെയും ബന്ധപ്പെടാനാകുമോ എന്നതിനെ ആശ്രയിച്ചായിരിക്കും ഇത് – അതായത്, മറ്റൊരു ഇമെയിൽ വിലാസം അല്ലെങ്കിൽ ഫോൺ നമ്പർ.

ഫോട്ടോഗ്രാഫുകൾ: കോണി മിർബാഹ്