ഡാറ്റ എങ്ങനെ ഡൗൺലോഡ് ചെയ്‌ത് സൂക്ഷിക്കാം

വ്യക്തിപരമായ ഡാറ്റ കമ്പ്യൂട്ടറിലേക്ക് ഡൗൺലോഡ് ചെയ്യാനോ മറ്റൊരു ദാതാവിലേക്ക് കെെമാറാനോ താൽപ്പര്യമുണ്ടോ? Google Takeout ഉപയോഗിച്ച് ഇവ രണ്ടും ചെയ്യാവുന്നതാണെന്ന് Google-ന്റെ സ്‌റ്റെഫാൻ മിക്‌ലിറ്റ്‌സും ഗ്രെഗ് ഫെയറും വിശദീകരിക്കുന്നു

മിക്‌ലിറ്റ്‌സ്, ഫെയർ, നിങ്ങൾക്കാണ് Google Takeout-ന്റെ ഉത്തരവാദിത്തമുള്ളത്. അതിന്റെ കൃത്യമായ ഉപയോഗം എന്താണ്?

സ്‌റ്റെഫാൻ മിക്‌ലിറ്റ്‌സ്, Google-ന്റെ സ്വകാര്യതാ, സുരക്ഷാ ടീമിലെ എഞ്ചിനിയറിംഗ് ഡയറക്‌ടർ: ഉദാഹരണത്തിന്, Google Drive-ൽ സംഭരിച്ച ഫോട്ടോകളും കോൺടാക്‌റ്റുകളും ഇമെയിലുകളും കലണ്ടർ എൻട്രികളും സംഗീത ഫയലുകളും നിങ്ങളുടെ കമ്പ്യൂട്ടറിലേക്ക് ഡൗൺലോഡ് ചെയ്യാനോ മറ്റൊരു ദാതാവിന് കെെമാറാനോ Google Takeout നിങ്ങളെ അനുവദിക്കുന്നു.

ഗ്രെഗ് ഫെയർ, Google Takeout-ന്റെ ഉൽപ്പന്ന മാനേജർ: എനിക്കും എന്റെ ഭാര്യയ്‌ക്കും രണ്ട് മക്കളുണ്ട്, മിക്ക രക്ഷിതാക്കളെയും പോലെ മക്കളുടെ ധാരാളം ഫോട്ടോകൾ ഞങ്ങളുടെ പക്കലുമുണ്ട് – കൃത്യമായി പറഞ്ഞാൽ 600 ജിഗാബൈറ്റ് ഫോട്ടോകൾ. ഈ ഫോട്ടോകളെല്ലാം അടങ്ങുന്ന ഞങ്ങളുടെ ഹാർഡ് ഡ്രെെവ് ക്രാഷായപ്പോൾ, മുഴുവൻ ഫോട്ടോകളും Google Photos-ലും സംരക്ഷിച്ചിരുന്നതിനാൽ ഞാൻ സന്തുഷ്‌ടനായിരുന്നു. തുടർന്ന് ആ ചിത്രങ്ങൾ പുതിയ ഹാർഡ് ഡ്രെെവിലേക്ക് ഡൗൺലോഡ് ചെയ്യാൻ Google Takeout ഉപയോഗിക്കാൻ എനിക്കായി.

ആളുകൾ എങ്ങനെയാണ് Takeout ഉപയോഗിക്കുന്നത്?

ഫെയർ: Google Drive-ൽ സംഭരിക്കുന്ന എല്ലാ ഡാറ്റയും ബാക്കപ്പ് ചെയ്യാനാണ് കൂടുതലായും അവർ ഇത് ഉപയോഗിക്കുന്നത്.

മിക്‌ലിറ്റ്‌സ്: യഥാർത്ഥത്തിൽ ഡാറ്റ, വീട്ടിലെ സ്‌റ്റോറേജ് ഉപകരണങ്ങളിൽ ഇരിക്കുന്നതിനേക്കാൾ ഏറ്റവും സുരക്ഷിതമായിരിക്കുക Google Drive-ൽ ആയിരിക്കും എന്നതിനാൽ ഇത് ഏറെക്കുറെ യുക്തിരഹിതമാണ്.

ഫെയർ: വീട്ടിലാകുമ്പോൾ ഹാർഡ് ഡ്രൈവിൽ പൂച്ച മൂത്രമൊഴിക്കുകയോ കുട്ടികൾ അത് തകർക്കുകയോ തീപ്പിടുത്തമുണ്ടാകുകയോ ചെയ്യാം. Google-ൽ ഓരോ ഫയലും വ്യത്യസ്‌ത സെർവറുകളിൽ പല തവണ സംഭരിക്കുന്നു. ഇതിലും സുരക്ഷിതമായി സംഭരിക്കാനാകില്ല.

കാര്യം ഇങ്ങനെയൊക്കെയാണെങ്കിലും താങ്കളും ഹാർഡ് ഡ്രെെവിൽ ഡാറ്റ ബാക്കപ്പ് ചെയ്യുന്നുണ്ടല്ലോ മിസ്‌റ്റർ ഫെയർ!

ഫെയർ: എന്റെ ഭാര്യ ചിത്രം എഡിറ്റ് ചെയ്യുന്ന പ്രോഗ്രാമുകൾ ഉപയോഗിക്കുന്നതിനാലും ചിത്രങ്ങൾ ക്ലൗഡിൽ സൂക്ഷിക്കുന്നത് പ്രായോഗികമല്ലാത്തതിനാലും ആണിത്.

പോർട്ടബിലിറ്റി എന്ന് മുതലാണ് Google-ന് ഒരു പ്രധാന വിഷയമായി മാറിയത്?

ഫെയർ: ഒരു ദശകത്തിലേറെയായി. വ്യക്തിഗത ഡാറ്റാ പോർട്ടബിലിറ്റി സേവനങ്ങൾ വികസിപ്പിച്ചാണ് ഞങ്ങൾ ആരംഭിച്ചത്. അതിന് ശേഷം 2011-ൽ Google അതിന്റെ കേന്ദ്രീകൃത സൊലൂഷൻ ലോഞ്ച് ചെയ്‌തു: Takeout. അന്ന് മുതൽ കൂടുതൽ Google സേവനങ്ങൾ നമ്മൾ ഏകീകരിച്ചിട്ടുണ്ട്, ഇന്ന് 40-ലധികം സേവനങ്ങൾക്ക് Takeout-ന്റെ പിന്തുണയുണ്ട്.

ധാരാളം ഉപയോക്താക്കൾ അവരുടെ ഡാറ്റ കമ്പ്യൂട്ടറുകളിലേക്ക് ഡൗൺലോഡ് ചെയ്യുമ്പോൾ വളരെ വിരളമായേ അത് മറ്റ് സേവനങ്ങളിലേക്ക് കെെമാറുന്നുള്ളൂ. ഈ അസന്തുലിതാവസ്ഥ നിലനിൽക്കുന്നത് എന്തുകൊണ്ടാണ്?

ഫെയർ: ഉപയോക്താക്കൾക്ക് Google-ൽ നിന്ന് Dropbox, Box അല്ലെങ്കിൽ Microsoft Office 365 എന്നിവയിലേക്കും മറിച്ചും തീർച്ചയായും ഡാറ്റ കെെമാറാനാകും. നമ്മുടെ എതിരാളികളിൽ പലരും ഇപ്പോഴും ഈ സാധ്യത നൽകുന്നില്ല. അത് മാറ്റാൻ ശ്രമിക്കുന്നതിന് 2017-ൽ ഡാറ്റാ കെെമാറ്റ പ്രൊജക്‌റ്റ് ഞങ്ങൾ ലോഞ്ച് ചെയ്‌തു, തുടർന്ന് 2018 ജൂലൈയിൽ പ്രൊജക്‌റ്റ് ഔദ്യോഗികമായി പ്രഖ്യാപിക്കുകയും ചെയ്‌തു. കമ്പനികൾക്ക് പോർട്ടബിലിറ്റി ഫംഗ്‌ഷനുകൾക്കായി സൗജന്യമായ കോഡ് നൽകുന്ന ഓപ്പൺ സോഴ്‌സ് പ്രൊജക്‌റ്റാണിത്, ഒരു സേവനത്തിൽ നിന്ന് മറ്റൊരു സേവനത്തിലേക്ക് തടസ്സരഹിതമായ ഡാറ്റാ കെെമാറ്റം ഇത് സാധ്യമാക്കുന്നു.

മിക്‌ലിറ്റ്‌സ്: ഒരു സ്‌റ്റാർട്ടപ്പ് മികച്ച ഒരു പുതിയ സേവനം വികസിപ്പിക്കുന്നു എന്ന് കരുതുക. ഒരു ചെറിയ കമ്പനിയെ സംബന്ധിച്ചിടത്തോളം സ്വന്തമായ പോർട്ടബിലിറ്റി സൊലൂഷൻ സൃഷ്‌ടിക്കുക എന്നത് താങ്ങാവുന്നതിലധികം ചെലവേറിയ കാര്യമാകും. അതിന് പകരം, ആ കമ്പനിക്ക് ഡാറ്റാ കൈമാറ്റ പ്രൊജക്‌റ്റിൽ പോയി അനുബന്ധ കോഡുകൾ അതിന്റെ സ്വന്തം സോഫ്‌റ്റ്‌വെയറിലേക്ക് കെെമാറാവുന്നതാണ്.

ഞാൻ മറ്റൊരു ദാതാവിലേക്ക് മാറുന്നതിൽ നിങ്ങൾക്കുള്ള താൽപ്പര്യം എന്താണ്?

ഫെയർ: നിങ്ങളുടെ ഡാറ്റ മറ്റൊരിടത്ത് ഉപയോഗിക്കാനാകില്ലെന്ന് നിങ്ങൾ കരുതുന്നത് കൊണ്ടല്ല മറിച്ച് ഏറ്റവും മികച്ച സേവനമായതിനാലാണ് നിങ്ങൾ Google സേവനങ്ങൾ ഉപയോഗിക്കേണ്ടതെന്ന് ഞങ്ങൾ താൽപ്പര്യപ്പെടുന്നു.

ഫോട്ടോഗ്രാഫുകൾ: കോണി മിർബാക്ക്