Die eenvoudigste, veiligste manier om sonder ’n wagwoord by jou rekeninge aan te meld
Toegangsleutels is ’n makliker en veiliger alternatief vir wagwoorde. Hulle stel jou in staat om met net jou vingerafdruk, gesigskandering of skermslot aan te meld. Laai ons eenbladsamevatting-PDF af om meer inligting te kry.
Ons het toegangsleutels help ontwikkel as ’n lid van die FIDO Alliance, ’n oopbedryfsvereniging wat daartoe verbind is om afhanklikheid van wagwoorde te help verminder, aanmeldings te vereenvoudig, en die internet veiliger te maak.
Toegangsleutels is 4x eenvoudiger om te gebruik aangesien hulle nie onthou of ingetik moet word nie. Jy gebruik eenvoudig jou vingerafdruk, gesigskandering of skermslot om op al jou toestelle en platforms aan te meld.
Toegangsleutels bied die sterkste beskerming teen bedreigings soos uitvissing. En aangesien hulle op jou plaaslike toestel geberg word, kan hulle nie geraai of hergebruik word nie; dit help om jou inligting teen aanvallers te beskerm.
Jou toegangsleutel bly privaat op jou persoonlike toestel en word nooit met Google of enige ander derdepartyvennote gedeel nie. Jy gebruik eenvoudig jou vingerafdruk, gesigskandering of skermslot om te verifieer dat dit jy is wat by jou private sleutel ingaan.
Toegangsleutels verskaf ’n eenvoudiger en veilige aanmeldervaring vir alle gebruikers met persoonlike Gmail-rekeninge, meer as 9 miljoen Google Workspace-klante, én derdepartyvennote.
Bring toegangsleutels na besighede en regerings
Toegangsleutels stel betekenisvolle sekuriteit en bruikbaarheidvoordele aan gebruikers beskikbaar, en ons is opgewonde daaroor om die eerste groot, publieke wolkverskaffer te wees wat hierdie tegnologie aan ons klante bied – van klein besighede en groot ondernemings tot skole en regerings.
Werk saam om wagwoordlose, veiliger aanmelding oral op die internet te verseker
Ons werk saam met handelsmerke om toegangsleutels oral op Chrome- en Android-platforms moontlik te maak en makliker, veilige aanmeldings vir hul gebruikers te skep. Vennote in die e-handel-, finansiëletegnologie- en reisbedryf – asook ander sagtewareverskaffers – het reeds saam met ons by die reis na ’n wagwoordlose toekoms aangesluit.
Sal toegangsleutels wagwoorde heeltemal vervang?
Ons visie is om na ’n wagwoordlose toekoms te beweeg, aangesien toegangsleutels aanmelding makliker en vinniger maak. Wagwoorde sal tydens hierdie oorgang steeds beskikbaar wees wanneer jy dit ook al wil gebruik.
Kan ek steeds my wagwoord gebruik om aan te meld nadat ek vir toegangsleutels ingeskryf het?
Ja, jy kan jou wagwoord en ’n 2e faktor, as jy een opgestel het, gebruik om aan te meld. Jy kan met toegangsleutels vinniger aanmeld as met jou wagwoord en jou tweede faktor.
Moet ek ’n toegangsleutel op al my toestelle individueel opstel? Sal daar afsonderlike toegangsleutels op my foon en skootrekenaar wees?
As Google bespeur dat jy nog nie ’n toegangsleutel op ’n toestel het nie, sal ons jou aanpor om een te skep. Jy sal een toegangsleutel per toestel nodig hê, tensy die toestel reeds een of ander meganisme het om toegangsleutels met ander toestelle te “sinkroniseer”, soos met Apple iCloud. In hierdie geval word slegs ’n enkele toegangsleutel vir al jou iCloud-toestelle vereis.
As ek probeer om by ’n nuwe toestel (soos ’n rekenaar by die biblioteek) aan te meld en ek het nie my foon by my om via toegangsleutel aan te meld nie, is daar ’n ander manier waarop ek kan aanmeld?
Ja, jy kan voortgaan om jou tradisionele aanmeldmetode te gebruik om aan te meld, wat in die meeste gevalle die gebruik van jou gebruikernaam en wagwoord sal behels.
Wat is die rekeningherwinningproses as ek uitgesluit is en nie my foon by my het nie – dis byvoorbeeld weg of gebreek – en nie my identiteit kan verifieer nie?
Jy kan altyd terugval op vorige stawingopsies, soos wagwoorde en tradisionele tweestapverifikasie. Indien jy nie meer jou wagwoord kan onthou nie, kan jy ook Google se rekeningherwinningvloei voltooi. Ons moedig jou aan om jou e-posadres en foonnommer by te voeg om seker te maak dat jy altyd toegang tot jou rekening kan kry.
Sal ek ’n toegangsleutel vir ander apps individueel moet opstel as hulle aan my Google-rekening gekoppel is?
As jy “Aanmeld met Google” gebruik, dan is die antwoord nee. Jy het die toegangsleutel slegs nodig om toegang tot jou Google-rekening te kry. As jy vandag direkte “wagwoordgegronde” aanmelding op ’n webwerf/diens/app gebruik, sal die opsie om met jou volgende aanmelding ’n afsonderlike toegangsleutel vir daardie diens te skep aan jou gebied word, mits die diens toegangsleutels steun.
Hoe verskil ’n toegangsleutel van hardeware-sekuriteitsleutels?
Toegangsleutels kan óf op ’n fisieke sekuriteitsleutel óf op jou toestel (foon, rekenaar, Mac, ens.) geberg word. Fisieke sekuriteitsleutels was jare lank die enigste plek waar gebruikers toegangsleutels kon berg. Nou, vir bykomende gerief, bied toegangsleutels wat op jou foon en ander toestelle geberg word dieselfde vlak van beskerming teen uitvissing as die beskerming wat jy met toegangsleutels-op-sekuriteitsleutels kry. Jy hoef niks anders te doen nie; dinge is net meer gerieflik. Pleks daarvan dat jy die toegangsleutel op jou fisieke sekuriteitsleutel nodig het wanneer jy aanmeld, kan jy nou ook die toegangsleutel op jou skootrekenaar of rekenaar gebruik.
Is dit verpligtend om intekening vir toegangsleutels te aanvaar?
Nee, jy kan besluit om steeds met jou wagwoord aan te meld. Soos gebruikers egter mettertyd gewoond raak aan toegangsleutels, sal ons dalk beperk waar ons die gebruik van wagwoorde toelaat, aangesien hulle minder veilig is as toegangsleutels.
jou aanlyn veilig hou.
-
Ingeboude sekuriteitKry meer inligting oor ons outomatiese sekuriteitbeskermings.
-
PrivaatheidskontrolesKies die privaatheidinstellings wat reg is vir jou.
-
DatapraktykeKry meer inligting oor hoe ons jou privaatheid respekteer met verantwoordelike datapraktyke.
-
VeiligheidswenkeOntdek kitswenke en beste praktyke om aanlyn veilig te bly.